السؤال يجيني كثير: ChatGPT أم Claude؟ جوابي المختصر إني مشترك في الاثنين، وكل واحد منهما أخذ مكاناً مختلفاً في يومي بعد أكثر من سنة استخدام. التفصيل تحت مبني على شغل حقيقي مرّ عليهما، لا على جدول مواصفات.
ChatGPT أم Claude: وش أعطيت لكل واحد من شغلي
Claude يأخذ عندي النصوص الطويلة اللي تحتاج بناءً متماسكاً، والشغل التقني اللي يمشي خطوة خطوة. ChatGPT يأخذ بدايات الأفكار لما أبي عشرة خيارات بسرعة، والأسئلة اليومية القصيرة. هذي القسمة ما جت من مقارنة قرأتها، جت من إني جرّبت أفرض أداة وحدة على كل شيء وطلعت النتيجة متوسّطة في كل شيء، وهو من الأخطاء اللي كلّفتني وقتاً.
وين كسب Claude عندي
أوضح مكسب له كان في البناء لا في الكلام: بنيت به ست أدوات أشتغل عليها فعلياً كل يوم، وكتبت التفصيل في تجربتي مع Claude Code. وفي الكتابة، النص الطويل يطلع منه مرتّباً ما يحتاج إعادة ترتيب بعدها، وهذا اللي خلاني أعتمده في كتابة المحتوى.
وين كسب ChatGPT
في السرعة والانتشار. لما أبي تنوّعاً في الأفكار خلال دقيقة، يعطيني أكثر منه. وانتشاره يعني إنك تلقى شرحاً لأي مشكلة تواجهك وتكاملاً مع أدوات كثيرة حولك. لو تبدأ من الصفر، هذي النقطة وحدها تستاهل أن تبدأ به، لأنك ما تشتغل مع الأداة فقط، تشتغل مع المجتمع اللي حولها.
عيب كل واحد منهما
Claude في النماذج المتقدّمة يستهلك رصيدك بسرعة إذا اعتمدت عليه بكثافة، فتحتاج تدير جلساتك بوعي لا تفتحها على الفاضي. وChatGPT أحياناً يعطيك جواباً عاماً، أو يجزم بمعلومة غلط بنفس نبرة الثقة. الاثنان يحتاجان مراجعتك، ومن ياخذ كلامهما مسلّماً به راح يدفع الثمن في وقت ما.
وأيّهما أفضل في العربية
الاثنان تحسّنا كثيراً وصارا يكتبان عربية مقبولة، والفرق بينهما في العربية أقل من الفرق بينهما في الإنجليزية. لكن ولا واحد منهما يغنيك عن قراءة النص بعينك قبل النشر، خصوصاً إذا كان النص داخل تصميم. أما Gemini فله مقال مستقل عندي في تجربتي مع Gemini.
وين يدخل Gemini بينهم
جرّبت Gemini معهم على نفس المهام، وبعد سنة صار سؤالي «أيّها الأنسب لهذي المهمة» بدل «أيّها الأفضل». Claude للنص الطويل والشغل التقني، و ChatGPT للسرعة وتنوّع الأفكار، و Gemini لما أحتاج معلومة قريبة من بحث جوجل. وإذا عندي نص طويل أبي أحلّله، أعطيه Claude، لأنه كان أريح لي في هذا من الاثنين الباقيين.
لو تبي تختار واحداً فقط
ابدأ بالأشهر عشان تلقى دعماً حولك وأنت تتعلّم، وخذ الثاني لما يكبر شغلك ويصير عندك مهام طويلة أو بناء أدوات. الاشتراكان معاً ما يناسبان كل أحد، وتكلفتهما ضمن اللي أدفعه شهرياً وشرحته في تكلفة أدوات الذكاء الاصطناعي. وقبل تدفع لأي منهما، اسأل نفسك وش المهمة اللي تتكرّر عندك كل أسبوع — إجابتك هي اللي تختار، لا المقارنات.