كنت في نص اجتماع مع عميل، وفجأة انقطع كل شي. Google Meet في نسخته المجانية يقفل الاجتماع عند الدقيقة 45، وتحتاج تفتح رابط جديد وترجع تجمع الناس من البداية.
هذي أول نقطة لازم تعرفها قبل ما تعتمد عليه، وتحتها تجربتي كاملة: ليش اخترته، وكيف استخدمته في شغلي فعلياً، ومتى يناسبك ومتى تحتاج غيره.
ليش اخترت Google Meet للاجتماعات
أنا ما دوّرت على أفضل أداة اجتماعات في السوق، دوّرت على أسرع أداة أقدر أفتحها الحين. Google Meet مجاني، وما يحتاج تنصيب ولا اشتراك، وتفتحه من المتصفح أو من الجوال بحساب قوقل اللي عندك أصلاً. ترسل الرابط، والطرف الثاني يدخل بضغطة وحدة حتى لو ما كان خبير تقني، وهذي وحدها وفّرت عليّ شرحاً طويلاً مع عملاء كثير.
كيف استخدمته فعلياً في شغلي
استخدامي له كان نوعين: مكالمة مع عميل مهتم بخدمة، ومتابعة سريعة مع أحد أشتغل معه. المكالمة المرئية تختصر رسائل طويلة تاخذ يومين، وتبني ثقة أسرع بكثير من الكتابة. والمتابعات القصيرة كنت أفتحها وقت ما أحتاجها بلا موعد ولا تحضير، وأحياناً أحضر الاجتماع من الجوال وأنا خارج المكتب.
وهذا بالضبط اللي خلّى عيبه يبان لي، لأني كنت أستخدمه كل أسبوع تقريباً.
العيب: حد الـ45 دقيقة
النسخة المجانية تعطيك 45 دقيقة للاجتماع الواحد، وبعدها يقفل. أغلب اجتماعاتي كانت تحت نص ساعة فما أثّر عليّ كثير، لكن أول مرة صار فيها كنت في نقاش مهم، والقطع في وقته السيّئ يكسر تركيز الطرفين، مو بس يضيّع دقيقتين في إعادة الدخول.
لو اجتماعاتك بطبيعتها تطول، تدريب أو ورشة أو نقاش معمّق، احسب هذا الحد من البداية.
وش سويت أنا مع الانقطاع
كل ما انقطع الاجتماع، كنت أفتح رابط اجتماع جديد ونبدأ من جديد، وهذا متعب جداً. فصرت أخلّي الاجتماع من البداية على 45 دقيقة. واليوم بدأت أنقل البث المباشر إلى يوتيوب، والاستشارات باقية على Google Meet.
كيف تخلي الـ45 دقيقة تكفيك
أرسل قبل الاجتماع ثلاث نقاط فقط: وش نناقش، وش القرار المطلوب، وكم وقتنا. الاجتماع اللي يبدأ بلا نقاط هو اللي يطول وينقطع.
وخلّ آخر خمس دقائق للقرار والخطوة الجاية، لأن أسوأ شي في القطع المفاجئ إنه يجي قبل ما تتفقون على شي.
متى يكفيك Meet ومتى تدور غيره
يكفيك إذا كانت اجتماعاتك قصيرة ومباشرة، ومع أشخاص ما تبي تعقّد عليهم بتحميل برامج وتسجيل حسابات. وما يكفيك إذا كانت جلساتك طويلة أو تحتاج إدارة مشاركين متقدمة، وقتها إما تنظّم وقتك داخل الـ45 دقيقة، وهذي عادة صحية بصراحة تخلي اجتماعك مركّز، أو تنتقل لنسخة مدفوعة.
وإذا كنت تشتغل على أدوات قوقل عموماً، هذي تجربتي في بيع الدورات على قوقل درايف.